Í samvinnu við Rómarrölt bjóðum við uppá skemmtilegar og fræðandi skoðunarferðir.
MIÐVIKUDAGA kl. 10:00
Aventino hæðin er eitt af hornum Rómarborgar sem engin má missa af. Byrjum ferðina á að skoða kirkju Heilags Valentínusar og gin sannleikans (La bocca della veritá). Göngum upp að Rósagarðinum þar sem er ótrúlegt útsýni yfir forna kappreiðarleikvanginn Circus Maximus og handan hans til Keisarahallanna fornu á Palatinum. Skoðum svo Appelsínugarðinn sem býður uppá stórkostlegt útsýni yfir borgina. Þar er einnig að finna perlu Aventino hæðar, Santa Sabina kirkjuna sem reist var 422-432 eftir Krist. Heimsækjum Norræna listamanna setrið í Róm sem var stofnað 1860. Kíkjum í gegnum frægasta skráargat borgarinnar og sjáum hvaða leyndardóm það felur. Göngum svo niður í Testaccio-hverfið, rólegt og hefðbundið rómverskt hverfi, þar sem Monte Testaccio, fjall úr brotnum leirkerum frá tíma Rómverja, stendur í miðju hverfisins. Að lokum heimsækjum við hinn líflega Testaccio-markað, þar sem hægt er að njóta ítalskra matarupplifana og stemningar.
Lengd: 2,5 - 3 klst.