Börn og ungbörn
Við viljum gera flugið sem ánægjulegast fyrir yngstu farþegana.
Afþreying um borð
Við viljum að börnin skemmti sér um borð.
Í afþreyingarkerfi okkar er að finna úrval af kvikmyndum og sjónvarpsefni fyrir börn á öllum aldri, allt frá leiknum kvikmyndum til teiknimyndaþátta. Börnin fá heyrnartól til afnota.
Við erum líka með blýanta og þrautabækur fyrir þau sem það kjósa.
Matur fyrir börnin
Börn (2-11 ára)
Öll börn á aldursbilinu 2-11 ára fá ljúffenga hressingu og safafernu um borð án endurgjalds. Ekki þarf að panta hressinguna fyrirfram.
Ungbörn (0-2 ára)
Við bjóðum einnig upp á hafragraut og ávaxtamauk fyrir ungbörn að kostnaðarlausu, en til þess að minnka matarsóun biðjum við foreldra um að panta fyrirfram. Hafið samband við þjónustuverið okkar að minnsta kosti 24 klukkustundum fyrir brottför til að panta hressingu fyrir ungbarn.
Heitt vatn er ávallt í boði um borð til að hita upp pela og krukkur með barnamat.
Að kaupa miða fyrir ungbarn
Þegar ferðast er með ungbarn undir 2 ára aldri (24 mánaða) er ekki tekið frá sæti fyrir barnið vegna þess að það situr í fangi foreldris.
Athugið að það er ekki hægt að gera bókun fyrir ófædd börn. Ef ferð er fyrirhuguð með ungbarn sem enn er ófætt, má bæta barninu við bókunina síðar þegar því hefur verið gefið nafn.
Hægt er að kaupa sæti fyrir ungbarn, en það verður að sitja í fangi foreldris við flugtak og lendingu. Farþegum sem ferðast með ungbarn er ekki heimilt að sitja í röð við neyðarútgang, eða í röð fyrir framan eða aftan neyðarútgang.
Það þarf að kaupa miða fyrir ungbörn. Miðarnir eru ódýrari en miðar fyrir eldri börn en það veltur á fargjaldaflokki miðans sem keyptur er hversu mikill afsláttur fæst.
Frekari upplýsingar um farangursheimild fyrir ungbörn má finna hér.
Barnabílstólar
Farþegum sem ferðast með börn, 2 til 11 ára, er heimilt að hafa samþykkta barnabílstóla með sér um borð að því gefnu að barnið sitji í stólnum á meðan fluginu stendur.
Þegar ferðast er með ungbörn undir 2 ára aldri er heimilt að hafa barnabílstól meðferðis um borð, sé laust gluggasæti í viðkomandi flugi. Farþegar geta tryggt sér sæti fyrir barnabílstól með því að kaupa barnafargjald.
Notkun barnabílstóla er heimil á öllum stigum flugferðarinnar, þar með talið við flugtak og lendingu, að því gefnu að:
- Barnabílstóllinn sé hannaður til festingar í sæti með tveggja punkta belti (venjulegum sætisólum í farþegasætum flugvéla). Barnabílstólar sem eru hannaðir eingöngu til festingar með þriggja punkta belti (venjulegu öryggisbelti í bílum) má ekki nota.
- Barnabílstóllinn uppfylli a.m.k. eitt af eftirtöldum skilyrðum:
- Barnabílstóllinn sé samþykktur til notkunar í ökutækjum í samræmi við Evrópustaðla ECE R44-03 eða nýrri viðbætur.
- Barnabílstóllinn sé samþykktur til notkunar í vélknúnum ökutækjum og flugvélum í samræmi við bandaríska staðla US FMVSS nr. 213 og hafi verið framleiddir samkvæmt þessum stöðlum frá og með 26. febrúar 1985. Barnabílstólar sem standast bandarískar kröfur verða að bera eftirfarandi merkingar með rauðu letri: 1) „This child restraint system conforms to all applicable federal motor vehicle safety standards“ og 2) „This restraint is certified for use in motor vehicles and aircraft“.
- Barnabílstóllinn sé samþykktur til notkunar í flugvélum í samræmi við þýska staðla um „Qualification Procedure for Child Restraint Systems in Aircraft“ (TUV Doc.:/958-01/2001).
- Barnabílstóllinn sé samþykktur til notkunar í vélknúnum ökutækjum og flugvélum í samræmi við kanadíska staðla CMVSS 213/213,1.
Barnabílstólinn skal festa tryggilega í gluggasæti með sætisól.
CARES (Child Aviation Restraint System) sætisfestingar fyrir börn eru samþykktar í vélum Icelandair. CARES er sérstaklega hannað fyrir börn frá 1 árs aldri sem ferðast með flugi og eru 10-20 kg að þyngd.
Flug á meðgöngu
Ef ákveðið er að fljúga á meðgöngutíma, þarf farþegi að ráðfæra sig við ljósmóður/lækni um flugið.
Barnshafandi farþegar sem eru á síðasta mánuði meðgöngu eða hafa áður eignast barn fyrir settan tíma, þurfa að hafa undir höndum læknisvottorð gefið út meira en 72 klst. fyrir brottför.
Ekki er mælt með að fljúga eftir viku 32 ef um áhættumeðgöngu er að ræða (t.d. ef von er á tvíbura-, fjölbura- eða fyrirburafæðingu). Gott er að hafa eftirfarandi í huga fyrir flug á meðgöngu:
- Fyrir meðgöngu án áhættu, er hægt að fljúga að viku 36.
- Ef flogið er á vikum 36-38, er mælt með að hámarkstími flugs sé undir 4 klst.
- Barnshafandi farþegar mega ekki fljúga á síðustu 2 vikum meðgöngu.
Athugaðu að flug eykur almennt ekki líkur á fylgikvillum á meðgöngu.
Ferðalög barna án fylgdar beggja foreldra
Við mælum með því að foreldrar kynni sér reglur stjórnvalda í ákvörðunarlandi fyrirfram ef barn þeirra, yngra en 18 ára, ferðast milli landa án beggja forráðamanna.
Þegar barn ferðast til útlanda án beggja forráðamanna gætu landamærayfirvöld krafist sönnunar um samþykki foreldra fyrir ferðalaginu. Annars barnið gæti orðið fyrir töfum eða synjun um inngöngu eða brottför. Ásamt vegabréfi er ráðlagt að hafa samþykkisyfirlýsingu og forsjárvottorð.
Ef barn ferðast með öðru forsjárforeldrinu gæti þurft samþykki hins, allt eftir reglum ákvörðunarlandsins, sérstaklega ef farið er með sameiginlega forsjá.
Hér er að finna reglur íslenskra stjórnvalda.