Skilmálar forfallagjalds

1.1 Forfallagjald þetta gildir fyrir farseðil með Icelandair eins og tekið er fram á reikningnum. Hægt er að greiða forfallagjald um leið og fargjald eða staðfestingargjald er greitt eða allt að 36 tímum eftir að flugmiðinn er bókaður.

1.2 Komist þú ekki í fyrirhugaða ferð endurgreiðir Icelandair ehf. viðkomandi farseðil, ef þú þarft að breyta ferðaáætlun eftir að ferð er hafin, mun Icelandair endurgreiða viðkomandi hluta farseðils (þann hluta farseðils sem hefur ekki verið notaður) eða breytingagjald (en ekki fargjaldamismun) samkvæmt skilmálum þessum.

1.3 Forfallagjaldið bætir viðkomandi farseðil ásamt fyrirframgreiddri auka þjónustu eins og aukafarangur, meira fótarými, máltíðir og fleiri auka þjónustur veittar af Icelandair í fyrirhugðu flugi. Forfallagjald nær ekki til þjónustu sem þegar hefur verð veitt, líkt og t.d. bókunargjalds eða ýmiss annars ferðatengds kostnaðar eins og gistingar, bílaleigu eða bókaðar afþreyingar.

1.4 Farið er fram á vottorð undirritað af lækni þar sem tilgreint er hvers eðlis veikindi þín eða slys eru fyrir viðkomandi ferðadagsetningu. Ef forfallatrygging er ekki fyrir hendi, fæst engin endurgreiðsla þó að læknisvottorði sé framvísað.

Læknisvottorð sem skilað er inn til að staðfesta skyndileg veikindi eða slys þarf að vera vottað af viðurkenndum heilbrigðisstarfsmanni fyrir þig, maka þinn eða aðra nánustu fjölskyldumeðlimi (sjá skilgreiningu í 2.1. a) og standast eftirfarandi skilyrði;

1.4.1 Þarf að vera gefið út af viðurkenndri heilbrigðisstofnun.

1.4.2 Þarf að tilgreina að ástæða fyrir afbókun sé bein afleiðing af skyndilegum alvarlegum veikindum eða slysi.

1.4.3 Þarf að tilgreina það tímabil þegar farþegi á ekki að ferðast og dagsetningar á flugmiða verða að vera innan þessa tímabils.

1.4.4 Þurfa að vera dagsettar eftir útgáfudag miðans.

1.5 Forfallagjald er ekki trygging heldur greidd auka þjónusta sem viðbót við flugmiða. Vátryggingarlöggjöf á því ekki við um forfallagjald.

1.6 Þegar vísað er í „þig“ eða „þinn“ er átt við farþega sem kaupir farseðilinn og forfallagjaldið.

2.1 Greiðsla forfallagjalds tryggir endurgreiðslu á þeim hluta fargjalds, sem greiddur hefur verið og ekki fæst annars endurgreiddur, ef þú getur ekki farið fyrirhugaða ferð vegna:

a) dauðsfalls, skyndilegs sjúkdóms eða slyss staðfest á læknisvottorði (eins og getið er í lið 1.4) þar sem þér eða öðrum ferðalöngum í sömu bókun er ráðlagt að ferðast ekki vegna skyndilegra veikinda eða slyss eða dauðsfalls einhvers í nánustu fjölskyldu þinni.

Skilgreining á nánustu fjölskyldu: maki þinn hvort sem um er að ræða í hjónabandi eða staðfestri sambúð, börn eða stjúpbörn, barnabörn, foreldrar eða tengdaforeldrar, systkini, afi og amma,

b) verulegs eignatjóns á heimili þínu eða í einkafyrirtæki sem þú ert eigandi að meirihluta, sem gerir nærveru þína nauðsynlega og fæst staðfest í lögregluskýrslu.

c) þess að þú færð COVID-19 (eða annan sjúkdóm sem alþjóðaheilbrigðismálastofnunin (WHO) skilgreinir sem heimsfaraldur) sem kemur í veg fyrir að þú getir hafið eða haldið áfram með ferðalag þitt. Jákvæða niðurstöðu þarf að sanna með samþykktu læknisfræðilegu prófi.

c. 1) Skjalið þarf að koma frá stofnun sem hefur formlegt leyfi til að gefa út skjöl af þessu tagi / læknisfræðilegri rannsóknarstofu / eða lækni með tilskilin réttindi. Heimapróf eru ekki samþykkt.

c. 2) Niðurstaðan úr COVID-19 prófinu verður að vera jákvæð.

c. 3) Jákvæða niðurstaðan þarf að vera dagsett innan 10 daga fyrir brottfarardag. Ef þú ert enn ófær um að verðast vegna veikinda 10 dögum eftir jákvæða niðurstöðu úr prófi, þarftu að hafa undir höndum vottorð frá lækni sem samræmist ofangreindum kröfum.

c. 4) Endurgreiðsla á ekki við um farþega í sóttkví sem ekki hafa undir höndum staðfest jákvætt próf sem samræmist liðum c. 1), c. 2) og c. 3) hér fyrir ofan.

2.2 Framangreind tilvik skulu vera þess eðlis að óhjákvæmilegt sé að afturkalla áður gerða pöntun. Forfallagjald er ekki endurgreiðanlegt.

3.1 Það er skilyrði fyrir því að endurgreiðsluréttur stofnist að:

a) forfallagjald sé greitt;

b) að þér sé ekki kunnugt um tjón eða hafir grun um yfirvofandi tjón sem stofnar til endurgreiðsluréttar, þegar forfallagjaldið er greitt.

4.1 Endurgreiðsluréttur stofnast ekki vegna eftirfarandi tjónstilvika;

a) tjóna sem verða vegna meiðsla sem menn veita sjálfum sér vísvitandi;

b) tjóna sem verða vegna veikinda sem tengja má til neyslu áfengra drykkja eða lyfja, utan lyfja sem tekin eru samkvæmt læknisráði, að frátöldum lyfjum vegna læknismeðferðar vegna notkunar ávana- og fíkniefna;

c) tjóna sem beint eða óbeint eru af völdum kjarnabreytingar, jónandi geislunar, mengunar af geislavirkum efnum, kjarnaeldsneytis og kjarnaúrgangsefnis eða af völdum styrjaldar, innrásarhernaðaraðgerða, borgararósta, uppreisnar, uppþots eða svipaðra aðgerða. Sama gildir um tjón sem beint eða óbeint eru af völdum jarðskjálfta, eldgosa, flóða, skriðufalla eða annarra náttúruhamfara;

d) tjóna sem verða vegna niðurfellingar eða seinkunar áætlunarferðar;

e) tjóna sem verða vegna sjúkdóms sem þú varst haldinn eða varst í meðferð vegna þegar forfallagjald var greitt, eða meðferðar hans vegna sjá b-lið 3.1.

5.1 Tilkynna skal tjón þegar í stað og framvísa læknisvottorði eins og tilgreint er í lið 1.4 (ef við á) eða lögleg staðfesting á nauðsyn læknismeðferðar eða lögregluskýrslu þar sem gerð er grein fyrir efnislegu tjóni eða tjóni á heimili þínu eða hjá einkafyrirtæki þínu, ásamt kvittun fyrir flugmiða.

5.2 Endurgreiðsla fer fram innan 45 daga eftir að fullnægjandi sannanir hafa borist fyrir endurgreiðsluskyldu Icelandair ehf. samkvæmt skilmálum þessum og unnt er að ákveða upphæð endurgreiðslu. Vottorð svo og önnur gögn sem Icelandair ehf. kunna að krefjast til að geta lagt mat á endurgreiðsluskyldu sína ber viðkomandi að leggja fram á eigin kostnað.

5.3 Ef þú átt jafnframt rétt á bótum úr vátryggingu vegna sama tjónsatburðar greiða Icelandair ehf. aðeins hlutfallslegar bætur.

Skýrir þú sviksamlega frá eða leynir atvikum er skipta máli um endurgreiðsluskyldu Icelandair ehf. glatar þú rétti þínum á hendur félaginu.

Heimili Icelandair ehf. og varnarþing er í Reykjavík. Mál, sem rísa kunna vegna endurgreiðslu samkvæmt skilmálum þessum, skal reka fyrir Héraðsdómi Reykjavíkur.