Flug til Denver

Þessi borg er ung í anda og hér er sko oft heiðskírt – í Denver skín sólin 300 daga á ári. Hjólastígar og garðar dreifa úr sér og halda heimamönnum uppteknum, svo ekki sé talað um brugghúsin og tónlistarhúsin. Matseld og listir blómstra í borginni og Denver Art Museum er listasafn á heimsmælikvarða – sem vert er að skoða. Hluti af safninu er í Hamilton Building, sem er nútímalegt og formfagurt meistarverk. Þar er að finna stærsta safn Bandaríkjanna af listaverkum eftir frumbyggja landsins. Það er einnig mögnuð umhverfislist og margt annað að sjá í miðbæ Denver.

Langar þig á tónleika? Einn af hápunktum Colorado er að fara á tónleika undir berum himni í Red Rocks, sem er í um 24 km fjarlægð frá Denver. Þetta er náttúrulegt hringleikahús sem liggur á milli klettadranga úr rauðum sandsteini og er einn fallegasti tónleikastaður Bandaríkjanna.

Frá flugvellinum er 20 mínútna akstur til fjallsróta Klettafjallanna og þar eru fjölbreyttir möguleikar til útivistar: gönguferðir, flúðasiglingar, kajakferðir, fiskveiðar, fjallaklifur, sem og stórgóðir golfvellir. Veturnir gefa sumartímanum ekkert eftir og þú veist hvað þín bíður: Skíði, snjóbretti og hví ekki lauma sér í smá „après ski“ þegar það býðst?  

Colorado státar af einhverjum bestu skíðasvæðum heimsins og í innan við 2 klukkustunda akstursfjarlægð frá Denver eru skíðaparadísirnar Keystone, Breckenridge og Winter Park. Ef þú ferð aðeins lengra vestur finnur þú svo allra frægustu og vinsælustu skíðastaðina í Colorado: Vail og Aspen.

Það eru óteljandi staðir í náttúru Colorado sem vert er að skoða. Ef þig langar að sjá sem mest, mælum við með ferð að sumri um hæsta malbikaða veg Norður-Ameríku. Hann leiðir þig upp á tind fjallsins Mt. Evans sem er um 4.300 metra hátt!