Flug til Innsbruck

Ríkulegur söguarfur borgarinnar vekur jafnframt áhuga og undrun. Þau sem vilja ná áttum og öðlast ágætis yfirsýn ættu að byrja í borgarturninum Stadtturm, en þar er hægt að príla upp 133 tröppur og virða fyrir sér fjöllin í bláum vetrarbjarma og sögulegar byggingar.

Eitt frægasta kennileiti borgarinnar er Gullþakið, eða Goldenes Dachl, sem reist var árið 1500 fyrir brúðkaup Maximillians I, keisara Hins heilaga rómverska ríkis. Gullhúðaðar koparflísar prýða þakið en þær eru 2657 talsins og þaðan kemur nafnið. Síðan er hægt að skoða Ambras kastalann frá 16. öld sem hýsir alls kyns listmuni, herbúnað og fjölmarga forvitnilega hluti. Næsta stopp í þessari glæsilegu skoðunarferð gæti verið Hofburg keisarahöllin, Horkirche kirkjan og tignarlegu hallargarðarnir þar í kring.

Matarhefðir Tíról voru sérhannaðar til að næra útivistarfólk svæðisins. Kjöt- og mjólkurvörur héraðsins eru sannkallað lostæti en þar vex einnig hágæða grænmeti á grænu akurlendi í fersku fjallalofti. Marendt forréttaplattinn, stútfullur af ostum, pylsum og brauðmeti, er sýnishorn af því besta sem Tíról hefur upp á að bjóða. Sælkerar fá að njóta í botn því víða eru staðir sem bjóða upp á afurðir svæðisins beint frá býli.

Dumplings með beikoni eða osti eru vinsælir í Tíról en þeir eru yfirleitt bornir fram ofan í súpu eða með súrkáli og salati. Enginn ætti að sleppa því að smakka kiachl sem er djúpsteikt deigbolla iðulega borin fram með súrkáli, en stundum matreidd á sætan hátt með sultu og flórsykri.