Flugið frá Reykjavíkurflugvelli (RKV) til bæjarins Kulusuk (KUS) tekur aðeins tvær klukkustundir. Þessi litli bær er staðsettur á samnefndri eyju á Austur-Grænlandi. Hér komast gestir í kynni við forna menningu Inúíta, sem birtist meðal annars í forkunnarfögru handverki úr rostungstönn og beini.
Í Kulusuk bjóða heimamenn upp á skemmtidagskrá fyrir ferðamenn þar sem m.a. má sjá hvernig veiðimenn bera sig að á kajökum og heyra ævagamla veiðimannasöngva, sem varðveist hafa í munnlegri geymd.
Að sýningunni lokinni er tilvalið að ganga upp að Stórasteini, þar sem veiðimenn hafa öldum saman staðið og skimað eftir bráð sinni. Þar er útsýni gott. Ægifagurt handverk er hluti af menningararfinum og því standa til boða prýðilegustu minjagripir.
Ferð á slóðir nágranna okkar í norðri er engu lík. Tröllauknir borgarísjakar lóna úti fyrir þorpinu og litskrúðug timburhúsin virka heldur lítilmótleg mitt í þessu harðneskjulega landslagi.
Í Kulusuk má enn sjá leifar af gamla grænlenska veiðisamfélaginu. Elstu íbúarnir ólust upp við rótgrónar hefðir, verklag og lifnaðarhætti sem tíðkast höfðu í árhundruð.
Siglingar og gönguferðir eru vinsæl afþreying á sumrin, en veturinn er árstíð skíða, vélsleða og hundasleða. Ferðir á hundasleðum eru enn algengar á Grænlandi. Bærinn Tasiilaq, sem er lítið eitt stærri en Kulusuk (íbúafjöldi er í kringum 2.000), er aðeins í 10 mínútna fjarlægð með þyrlu, en þar er boðið upp á fjölbreyttara úrval ferða.
