HönnunarMars 2024
Við erum stoltur styrktaraðili hátíðarinnar í ár, sem fer fram í Reykjavík dagana 24. - 28. apríl.
Sköpunargleðinni fagnað
HönnunarMars fer nú fram í 15. skipti, og þó viðburðurinn sé kenndur við marsmánuð, fer hann fram í apríl þetta árið. Markmiðið með HönnunarMars hefur ávallt verið að fanga sköpunarkraftinn í íslensku samfélagi og deila gleðinni með heiminum.
Sýningarnar og viðburðirnir sem fram fara sýna þá breidd sem má finna í íslenskri hönnun, í arkítektúr, keramik, tísku, skartgripahönnun, húsgagnasmíði, innanhúshönnun, textíl, grafískri hönnun, iðnhönnun, margmiðlun, og á ótalmörgum öðrum sviðum.
Icelandair er stoltur styrktaraðili HönnunarMars enda samræmist hátíðin markmiði okkar um að halda uppi merkjum Íslands og íslenskrar menningar. Nánari upplýsingar um dagskrána má finna á vefsíðu HönnunarMars 2024.
2023: Icelandair x Rebekka Ashley
Á sýningunni Af tösku ertu kominn mátti sjá hönnun sem leggur áherslu á endurnýtingu og sjálfbærni. Sýningin var hluti af HönnunarMars 2023 og þar mátti finna lausn við þeirri þraut að gera sófa úr 625 gölluðum fartölvutöskum. Sýningin var afrakstur samstarfs Rebekku Ashley og Icelandair.
Rebekka er vöruhönnuður sem leggur upp með umhverfisvitund, sjálfbærni og endurnýtingu í öllu sem hún tekur sér fyrir hendur. Á sýningunni mátti sjá hönnunarferlið á bak við sófann Lög, til dæmis hvernig hönnuðurinn sótti innblástur í fjallalandslag.
2022: Icelandair × Plastplan
Íslenska fyrirtækið Plastplan sérhæfir sig í að nýta plastúrgang frá fyrirtækjum og breyta í nytjahluti. Markmið þeirra er að vinna að sjálfbærni og hringrás efnisnotkunar og finna notagildi á óvæntum stöðum.
Við kynntumst Plastplan árið 2021 þegar við unnum að heimildarmynd fyrir Hönnunarmars. Björn Steinar Blumenstein, einn stofnenda fyrirtækisins, sýndi okkur hvernig þeir nýta plastúrgang og nota hugarflugið í samspili við tækni til þess að framleiða hluti sem eru ekki bara fyrir augað heldur hafa líka notagildi. Við vorum svo innblásin af þeirra vinnu að við ákváðum að fara í samstarf við þau og hófum leit að réttu verkefni.
Minjagripur sem segir sögu
Í aðdraganda HönnunarMars 2022 kom loks tækifærið – áhugafólk um hönnun hvaðanæva að úr heiminum var um það bil að leggja leið sína til Íslands og við vildum gefa þeim eitthvað ferðatengt sem segir eftirminnilega sögu. Þar kom til kasta Plastplans, en þau hönnuðu og framleiddu töskumerkingar úr úrgangsplasti. Þessi skemmtilegu og litríku töskuspjöld lífga upp á tilveruna og minna á að verðmæti leynast víða. Meira að segja í rusli.
Samstarfið gerir okkur kleift að takmarka þann plastúrgang sem fer í urðun eða er sendur úr landi til endurvinnslu og er eitt lítið skref sem við erum að taka á vegferð okkar til grænni framtíðar.