Reyndu að fá sem mestan svefn áður en flugvélin snertir jörð í Madríd; þessi borg vakir helst frameftir og okkur grunar að þú viljir ekki missa af því. Barir og næturlíf eru margrómuð – en það er sitthvað fleira um að vera í þessari skemmtilegu borg.
Madríd er menningarborg þar sem ferðalangar geta virt fyrir sér list á heimsmælikvarða, fjöruga flamenco-dansa og þrumuskot á fótboltavellinum.
Byrjaðu daginn á því að fylgjast með mannlífinu og skipuleggja ferðina með drykk í hönd við eitt af stóru torgunum. Þú getur valið úr fjölmörgum fallegum torgum; Plaza Mayor, Plaza de Cibeles og Puerta del Sol eru allir góðir valkostir. Svo þarf að taka ákvörðun: Viltu fara í skoðunarferð um hina dýrðlegu konungshöll, Palacio Real, eða skoða stórkostleg listaverk í Museo del Prado eða Museo Reina Sofia? Ekki má missa af spænskum stórmeisturum á borð við Picasso, Goya, Dalí og Velázquez.
Ef þú hefur meiri áhuga á fótbolta skaltu halda beint á Santiago Bernabéu, heimavöll Real Madrid, eða á Wanda Metropolitano, heimavöll Atlético Madrid. Fáðu þér miða á leik og fagnaðu með hinum tugþúsundum áhangenda og upplifðu alvöru ástríðu eða farðu einfaldlega í skoðunarferð um leikvanginn. Smá siesta seinnipart dags sakar ekki – El Retiro er dásamlegur garður fyrir smá stopp. Kvöldið býður þín með úrvali af menningartengdri afþreyingu: Hvernig væri að fara á ósvikna flamenco-sýningu eða jafnvel sjá eitt umdeilt nautaat?
Til í að leika við bragðlaukana? Farðu í leiðangur um líflegu tapasbarina í La Latina-hverfinu. Haltu í átt að strætinu Calle de la Baja til að upplifa alvöru úrval af tapas, allt frá hefðbundnum réttum til tapas með nútímalegu ívafi. Meðal annarra hverfa sem státa af mörgum veitingastöðuum eru Malasaña, Chueca og Salamanca. Leitaðu eftir einkennisrétti borgarinnar, cocido madrileño, sem er kássa úr kjúklingabaunum. Þetta er saðsamur réttur með fullt af kjöti og grænmeti, og best er að njóta hans á vetrarkvöldum.
Markaðir og mathallir bjóða einnig upp ljúffenga rétti. Mercado de San Miguel er einkar fallegur markaður sem eldist vel og Platea í Salamanca er glæsilega endurppgert leikhús sem er heimastaður framúrskarandi úrvals af veitingastöðum og börum. Þar er einnig svið þar sem oft fara fram spennandi tónleikar.
Gaman er að vafra um El Rastro á sunnudagsmorgnum – þessi stóri flóamarkaður er endalaus uppspretta af fjársjóðum og skrani. Ef þú ert í leit að hefðbundnari verslunum skaltu halda til hverfisins Salamanca en þar eru stórverslanir og spænsk hátískuvörumerki sem keppast um athygli ásamt flottum hönnunarbúðum (Halló skóbúðir!). Calle de Serrano er góð gata ef þú ætlar að endurnýja fataskápinn og sérvörur eru fáanlegar á Calle de José Ortega y Gasset.
Hægt er að finna flotta spænska hönnun í hverfunum Malasaña, Chueca og La Latina. Flottir minjagripir eru seldir í verslunum stórsafnanna og það er ekkert lát á sælkeravörum sem þú getur tekið með heim (skinka, vín, ostar, olífur og fleira).
