De Havilland Canada DHC-8-400

Auður djúpúðga var eina konan sem fór fyrir leiðangri til Íslands. Hún þótti afbragð annarra kvenna, útsjónarsöm og djúpvitur eins og viðurnefnið gefur til kynna. Hún missti mann sinn og einkason, en sigldi til Íslands með barnabörn sín. Á leiðinni kom Auður við í Orkneyjum og Færeyjum og gifti þar sonardætur sínar. Sagt er að landnám hennar hafi verið öll Dalalönd í Breiðafirði. Auður var kristinnar trúar og þótti einstaklega göfug og stórmannleg. Hún gaf skipverjum sínum miklar jarðir í landnámi sínu en sjálf bjó hún þar sem nú er kirkjubærinn Hvammur í Dölum.

Alræmdasta kvenhetja Íslendingasagna er Hallgerður langbrók. Hún var glæsileg, hárprúð og fögur og lét engan vaða yfir sig. Hún stofnaði til illinda við nágrannakonu sína Bergþóru og eiginmaður Hallgerðar, Gunnar á Hlíðarenda, þurfti að gjalda fyrir löðrunginn sem hann veitti henni með lífi sínu. Á ögurstundu neitaði Hallgerður Gunnari um lokk úr hári sínu svo hann gæti gert við bogastreng sinn. En hvaðan kemur viðurnefnið langbrók? Ein skýringin er sú að þessi hávaxna kona hafi verið með eindæmum leggjalöng. Hún gæti einning hafa verið kölluð "langbrok", sem merkir "hin síðhærða".

Átti hún svona fallegt sjal, hyrnu yfir höfuð og herðar? Þórunn var fyrsta konan sem nam land í Eyjafirði ásamt manni sínum, Helga magra. Þórunn hyrna var systir Auðar djúpúðgu sem er frægust landnámskvenna. Þegar Þórunn og Helgi sigldu inn fjörðinn í leit að bæjarstæði eignaðist Þórunn hyrna stúlkubarn á litlum hólma í Eyjafjarðará. Þar kom í heiminn fyrsti innfæddi Eyfirðingurinn, Þorbjörg hólmasól.