Skilmálar Icelandair Saga Club

Um Vildarpunkta

Félagar í Icelandair Saga Club safna Vildarpunktum þegar þeir kaupa vöru og þjónustu hjá Icelandair og hjá samstarfsaðilum okkar um allan heim.

Hægt er að nota Vildarpunkta sem greiðslu fyrir flug og ýmsar þjónustur sem eru í boði hverju sinni í gegnum samstarfsaðila Icelandair Saga Club, sjá nánar í kafla um notkun Vildarpunkta.

Um Fríðindastig

Þegar Saga Club félagar safna Vildarpunktum með því að fljúga með Icelandair eða með kaupum á veitingum um borð, ávinna þeir sér samsvarandi upphæð Fríðindastiga. Undantekning frá þeirri reglu er að Saga Gold og Saga Silver félagar safna fleiri Fríðindastigum fyrir flug með Icelandair heldur en Vildarpunktum, sjá nánar hér.

Fríðindastigastaða ákvarðar um hvers konar aðild Saga Club félagar eru með og þar með hvaða fríðinda þeir njóta hjá Icelandair. Þegar tilskildum fjölda stiga er náð yfir 12 mánaða tímabil veita þau Saga Silver aðild og svo Saga Gold aðild og þar með aukin fríðindi, sjá nánar hér.

Saga Blue aðild

Saga Club félagar öðlast Saga Blue aðild um leið og þeir gerast félagar í Icelandair Saga Club.

Saga Silver aðild

Saga Club félagi þarf að safna 40.000 Fríðindastigum á 12 mánaða tímabili til að fá aðild að Saga Silver. Saga Silver aðild gildir í 12 mánuði.

Nái Saga Silver félagi 30.000 Fríðindastigum á 12 mánaða endurnýjunartímabili sínu fær hann Saga Silver aðild sína endurnýjaða til eins árs. Áunnin Saga Silver fríðindi falla niður um leið og aðild Saga Club félaga uppfærist, þ.e. þegar Saga Silver félagi færist upp í Saga Gold aðild, eða færist niður í Saga Blue aðild.

Saga Gold aðild

Saga Club félagi þarf að safna 80.000 Fríðindastigum á 12 mánaða tímabili til að fá aðild að Saga Gold. Saga Gold aðild gildir í 12 mánuði.

Nái Saga Gold félagi 70.000 Fríðindastigum á 12 mánaða endurnýjunartímabili sínu fær hann Saga Gold aðild sína endurnýjaða til eins árs. Áunnin Saga Gold fríðindi falla niður um leið og aðild Saga Club félaga breytist, þ.e. þegar Saga Gold félagi færist niður í Saga Silver eða Saga Blue aðild.

Endurnýjunar- og söfnunartímabil

Endurnýjunartímabili Saga Silver og Saga Gold aðildar lýkur einum mánuði áður en aðildarkortið rennur út.

Til dæmis: ef aðildarkort gildir út 12.2024 (desember 2024), er söfnunartímabilið frá 1.12.2023-30.11.2024.

Aðildarkortið er sjálfkrafa endurnýjað í þeim mánuði sem eldra kortið rennur út.

Athugið að Fríðindastig gilda í 12 mánuði frá söfnunardegi.

Saga Club félagar geta eytt Saga Club reikningum sínum, en með því að eyða reikningnum þá munu félagar tapa varanlega öllum uppsöfnuðum Vildarpunktum, fríðindum og upplýsingum um afstaðin flug. Hægt er að óska þess að eyða Saga Club reikningi í gegnum Icelandair appið eða með því að hafa samband við okkur.

Saga Club félagar geta sótt stafrænt Saga Club kort endurgjaldslaust í Icelandair Appinu með því að skrá sig þar inn, þá er hægt að nota stafræna kortið í appinu eða ná í kortið og bæta við Google eða Apple Wallet í símanum. 

Einnig er í boði að panta Saga Club plastkort með því að fara í gegnum Saga Club reikninginn og velja þar „Panta nýtt Saga Club kort“ sem er í boði gegn gjaldi og þarf þá að athuga að rétt heimilisfang sé til staðar. 

Saga Club félagar geta notað Saga Club kortið til þess að greiða með Vildarpunktum um borð eða safna punktum um borð, ásamt því að framvísa korti fyrir ákveðin sértilboð fyrir félaga.

Saga Gold og Saga Silver félagar fá Saga Club aðildarkort send heim til sín á skráð heimilisfang, endurgjaldslaust, um leið og þeir ná Saga Gold eða Silver aðild og við endurnýjun aðildar. 

Ef félagi í Saga Club breytir um nafn þarf viðkomandi að óska eftir nafnabreytingu á Saga Club reikningi sínum.  

Ef Saga Club kort glatast er hægt að panta nýtt kort á Saga Club reikningi þínum gegn vægu gjaldi. Það tekur að jafnaði 7-8 virka daga að berast til viðkomandi innan Íslands en gera má ráð fyrir 10-21 virkum dögum utan Íslands. Einnig er hægt að hafa samband við okkur og panta nýtt kort.  

Saga Club félagar geta safnað Vildarpunktum á margvíslegan hátt svo sem fyrir flug með Icelandair, veitingar um borð, hótelgistingar, bílaleigur, með kreditkortum sem bjóða upp á Vildarpunktasöfnun eða með fjölmörgum samstarfsaðilum Saga Club. Öll punktasöfnun er skráð á Saga Club reikning Saga Club félagans. Yfirlit Vildarpunktasöfnunar er aðgengilegt á Saga Club reikningi félagans. Saga Club félagar geta skráð Vildarpunkta allt að 12 mánuði aftur í tímann fyrir flug sem þeir hafa flogið og það sama á við um aðra vöru eða þjónustu sem veita Vildarpunkta.

Áætlunarflug Icelandair, og áætlunarflug samstarfsflugfélaga Icelandair, Alaska Airlines og JetBlue, gefur bæði Vildarpunkta og Fríðindastig. Viðskipti við aðra samstarfsaðila gefa eingöngu Vildarpunkta. Einungis miðar sem keyptir eru á skráðu fargjaldi gefa Vildarpunkta. Punktafjöldi miðast við það fargjald sem keypt er og Saga Club félagi greiddi fyrir en ekki við farrýmið sem Saga Club félagi notar í reynd þ.e. ef Saga Club félagi er uppfærður milli farrýma.

Engir Vildarpunktar fást fyrir flugmiða sem gefnir eru út samkvæmt sérstökum samningum eða tilboðum. Vildarpunktar og Fríðindastig ávinnast fyrir flugferðir í áætlunarflugi Icelandair sem Saga Club félagi sjálfur fer í óháð hver greiðir fyrir flugfarið. Engir Vildarpunktar eru veittir fyrir flugmiða sem eru keyptir en eru síðan ekki notaðir. Félagi í Saga Club fær Vildarpunkta fyrir flug sem hann flýgur sjálfur en fær ekki punkta fyrir flugmiða sem hann kaupir fyrir aðra.

Í hvert skipti sem flugfar er pantað á áætlunarleiðum Icelandair eða þjónusta hjá samstarfsaðilum þarf að skrá inn Saga Club númer eða gefa sölumanni upp Saga Club númer til að safna Vildarpunktum fyrir flugið. Saga Club númerið verður að skrá í allar einstaka flugbókanir því annars skila Vildarpunktar sér ekki á Saga Club reikninginn. Hjá samstarfsaðilum Saga Club þarf að skrá Saga Club númer við kaup á vörum og þjónustu, sjá nánari upplýsingar um Vildarpunktasöfnun hér.

Við andlát félaga í Icelandair Saga Club getur lögerfingi/maki sem heimild hefur til setu í óskiptu búi/skiptastjóri fengið aðgang að reikningi viðkomandi og fengið Vildarpunkta hins látna flutta yfir á annan Saga Club reikning.

Til þess að sækja um að erfa Vildarpunkta skal viðkomandi senda eitthvað af eftirfarandi*:

• Staðfestingu, t.d. frá sýslumanni, til Saga Club að viðkomandi sé lögerfingi hins látna. Ath. slíkri staðfestingu skal fylgja samþykki allra annarra lögerfingja fyrir ráðstöfuninni ef um fleiri en einn lögerfingja er að ræða eða;
• Staðfestingu á því að viðkomandi hafi heimild til setu í óskiptu búi eða;
• Afrit af úrskurði dómara þess efnis að viðkomandi sé skipaður skiptastjóri dánarbús hins látna.

*Allar staðfestingar skulu undirritaðar auk þess að þeim skulu fylgja upplýsingar um nöfn og kennitölur eins og við á.

Til að sjá Vildarpunktastöðuna sína þurfa félagar að skrá sig inn á Saga Club reikninginn sinn.

Einnig er hægt að hafa samband við Þjónustuver Icelandair .

Vildarpunktar fyrir flug með Icelandair eru skráðir allt að 3 sólarhringum eftir flug en skráningar á Vildarpunktum frá samstarfsaðilunum geta tekið allt að 60 daga.

Saga Club félögum er eindregið ráðlagt að fara vel yfir yfirlitin og athuga hvort allar flugferðir og þjónusta hafa verið skráðar. Til öryggis ættu Saga Club félagar ávallt að geyma alla flugmiða, brottfararspjöld og kvittanir.

Saga Club félagar geta notað Vildarpunktana sína hjá Icelandair eða samstarfsaðilum Saga Club. Nánari upplýsingar um Vildarpunktanotkun má finna hér.

Hægt er að kaupa Vildarpunkta fyrir sjálfan sig auk þess sem Saga Club félagar geta millifært Vildarpunkta á milli Saga Club reikninga. Færslugjald er innheimt fyrir hverja millifærslu. Nánari upplýsingar hér.

Þrátt fyrir að einstaka millifærslur Vildarpunkta séu heimilar þá er óheimilt að kaupa og selja Vildarpunkta í atvinnuskyni eða að auglýsa kaup og sölu á Vildarpunktum án samþykkis Icelandair. Þá er hvers konar markaðssetning tengd Vildarpunktum óheimil án samþykkis Icelandair. Icelandair áskilur sér rétt til að ógilda hvers konar millifærslur Vildarpunkta sem eiga sér stað með framangreindum hætti og jafnframt að loka reikningum þeirra félaga sem stunda slíka háttsemi.

Vildarpunktar gilda í allt að 4 ár þ.e. almanaksárið sem Vildarpunktar ávinnast og næstu 3 ár. Ef Saga Club félagi nýtir ekki Vildarpunktana á þessu tímabili falla þeir niður 31. desember.

Fríðindastig gilda í 12 mánuði frá þeim degi sem þau ávinnast. Eftir þann tíma falla Fríðindastig niður og telja ekki lengur upp í aðildarstig Saga Silver og Saga Gold.

Upplýsingar um punktasöfnun og punktanotkun hjá samstarfsaðilum Saga Club má finna á Saga Club síðunum.

Icelandair áskilur sér rétt til að leggja Saga Club niður eða breyta honum hvenær sem er, með því eða án þess að tilkynna slíkt sérstaklega. Í þessu felst réttur Icelandair til að fella niður eða breyta reglum, Vildarpunktakerfi, skilmálum við afhendingu þjónustu tengt Saga Club og úthlutun Saga Club korta. Verði Saga Club lagður niður, er Icelandair heimilt að fella niður alla áunna Vildarpunkta. Icelandair mun leitast við að tilkynna Saga Club félögum fyrirfram ef tekin verður ákvörðun um að leggja Saga Club niður. Icelandair bera enga ábyrgð á tjóni eða tapi sem Saga Club félagar kunna að verða fyrir vegna breytinga á reglum þessum eða vegna þess að Saga Club er lagður niður.

Þjónusta tengd Saga Club er boðin með fyrirvara um breytingar. Icelandair hefur gert samstarfssamninga við aðra aðila um að veita Saga Club félögum ákveðna þjónustu. Icelandair mun leitast við að sjá til þess að slíkir þjónustuþættir verði í boði en ábyrgjast það ekki. Icelandair er ekki ábyrgt fyrir skaða sem hlýst af vanefndum samstarfsaðila. Icelandair ábyrgist heldur ekki skaða vegna þess að slíkur samstarfsaðili slítur samstarfi sínu við Saga Club.

Félagar Saga Club verða eðli málsins samkvæmt að lúta skilmálum Saga Club líkt og þeir eru á hverjum tíma en geta ella sagt sig úr Saga Club með því að senda skriflega ósk þar um telji þeir sig ekki geta sætt sig við efni skilmálanna.