Flug til Malaga með Icelandair - verð frá 43.905 kr.*

Malaga í hnotskurn

Malaga tekur þér opnum örmum. Borgin er staðsett í hjarta Costa del Sol, sem þýðir bókstaflega "sólarströndin", svona til þess að stilla væntingarnar um milt veðurfar og strendur sem aldrei virðast enda strax í byrjun. Hún hefur að geyma allt sem þarf í gott frí - ljúffengt sjávarfang, ómótstæðilegt tapas, líflega listasenu og svona mætti lengi halda áfram!

Við höfum nú bætt Malaga við leiðakerfið okkar og fljúgum þangað einu til tvisvar sinnum í viku frá 6. september 2025. Bókaðu núna til að kynnast þessari sólríku, spennandi borg.

Ferðalag um Costa del Sol

Það kemur mörgum á óvart að Malaga er sjötta stærsta borg Spánar, þar búa um 600.000 manns. Saga borgarinnar spannar yfir 2800 ár, sem gerir hana að einni elstu samfelldu byggð Vestur-Evrópu. Malaga er líka miðpunktur Costa del Sol, svæðis sem áður var röð rólegra sjávarþorpa en er nú eitt vinsælasta ferðamannasvæði Spánar.

Costa del Sol teygir sig frá La Línea de la Concepción, rétt norðan við Gíbraltar, í vestri til Nerja í austri, alls um 150 km af fallegri strandlengju. Meðal vinsælla staða eru Estepona, Marbella, Fuengirola, Benalmádena, Torremolinos og Nerja. En það er ekki bara ströndin sem dregur að, svæðið er fullt af golfvöllum, lystibátahöfnum og skemmtigörðum fyrir alla fjölskylduna. Ferðalangar sem halda aðeins lengra inn til landsins geta svo uppgötvað hin frægu hvítu þorp Andalúsíu.

Hlutir til að sjá í Malaga

Það er auðvelt að stökkva af ströndinni í skoðunarferð í Malaga. Sterkasta aðdráttaraflið hefur Picasso safnið, Museo Picasso, tileinkað listamanninum sem fæddist í Malaga árið 1881 og öðlaðist síðar heimsfrægð. Viljir þú kynnast málaranum betur getur þú heimsótt fæðingarstað hans við Plaza de la Merced 15. Listunnendur geta einnig heimsótt Museo Carmen Thyssen eða útibú franska Centre Pompidou í Malaga.

Í hlíðum Malaga er að finna Alcazaba hallarvirkið. Það er frá 11. öld, á tímum Mára og hefur að geyma heillandi hvelfingar, hallargarða og gosbrunni. Það er af mörgum álitið eitt það fallegasta sinnar tegundar á Spáni. Dómkirkja borgarinnar var reist á 16. öld og elsta kirkja borgarinnar, Santiago kirkjan, var vígð árið 1490. Í leit að nútímalegri afþreyingu? Þá er Soho hverfið málið, fullt af veggmyndum og götulist.

Hvað er að gera í Malaga?

Það er eiginlega ekki hægt að tala um áfangastað við sjálfa Sólströndina (Costa del Sol) án þess að nefna strendurnar. Malaga býður upp á fjölbreytt úrval fyrir sólþyrsta ferðalanga, þar á meðal La Malagueta, La Misericordia, El Palo og Pedregalejo. La Malagueta er næst gamla miðbænum og því í stuttu göngufæri. Tíu mínútna ganga meðfram ströndinni leiðir þig framhjá fjölmörgum veitingastöðum og strandbörum. El Palo er líka skemmtilegur kostur, ekki bara vegna strandarinnar heldur líka hversdagslegs sjarma gamla sjómannahverfisins í kring.

Malaga er líka frábær byrjun á strandævintýri meðfram Costa del Sol. Nerja, sem er í aðeins klukkutíma fjarlægð í austur, er í miklu uppáhaldi hjá bæði ferðafólki og heimamönnum. Þar mætast steinlagðar götur, hvítmáluð hús og fallegar sandstrendur með afskekktum víkum.

Matarmenning Malaga

Bragðlaukarnir vakna til lífsins í Malaga. Byrjum á morgunmatnum: pitufo er lítið brauð sem er fyllt með ólífuolíu og tómötum, skinku og osti eða öðrum ljúffengum samsetningum. Ef þú vilt prófa eitthvað andalúsískt, skaltu smakka zurrapa, svínakæfu smurða á brauð. Og af því þú ert við sjóinn er sjávarfangið alltumlykjandi. Chiringuitos, strandbarirnir sem finnast um alla borg, bjóða upp á steiktan fisk, sardínur á teini og hefðbundna rétti eins og ajoblanco (köld hvítlaukssúpa) og boquerones – ansjósur í ediki.

Frjósamar nærsveitir gefa af sér úrval víns, ólífa, pylsna, osta og ferskra ávaxta. Og að sjálfsögðu má ekki sleppa eftirréttinum: borrachuelos eru stökkar, sykraðar kökur með sultufyllingu, tortas locas eða „brjáluðu kökurnar“ eru smjördeigshálfmánar fylltir með vanillukremi, með appelsínugljáa og kirsuberi ofan á.

Verslunarferð til Malaga

Litað gler, töff arkitektúr og ljúffeng ferskvara taka höndum saman og gera Mercado Atarazanas að nauðsynlegu stoppi í hverri góðri verslunarferð. Calle Larios svalar þorstanum í tísku og hönnunarvöru ásamt Calle Compañía og Calle Nueva sem vert er heimsækja.

Rétt fyrir utan Malaga finnurðu Plaza Mayor sem er stórt útimoll, steinsnar frá flugvellinum, fullt af alþjóðlegum verslanakeðjum. Annað moll sem vert er að hafa á bak við eyrað er hönnunaroutlettið við Plaza Mayor sem er frábær staður til að næla sér í lúxus vöru og eiga samt fyrir kvöldmat.

Minjagripir sem gott er að næla sér í eru ólívuolía, vín, múskatrúsínur, andalúskísk keramík eða töff Picasso plakat.

Frá A til B

Við lendum á Malaga–Costa del Sol flugvelli, megin alþjóðaflugvelli svæðisins, um 8 km suðvestur af miðborginni. Reglulegar rútur og lestir tengja flugvöllinn við Malaga. Lestin gengur líka til Torremolinos og Fuengirola til vesturs, en rútur fara beint til Marbella, Estepona og Nerja í austri.

Innan borgarinnar er neðanjarðarlestarkerfi þar sem tvær línur tengja miðbæinn við vesturhlutann og háskólasvæðið. Þá er einnig víðfemt strætókerfi. Aðalstrætóstöðin er við hliðina á María Zambrano lestarstöðinni og neðanjarðarlestarstöðinni, sem gerir þér auðvelt að komast leiðar. Leigubílar og samflot (eins og Uber og Lyft) eru vinsælir kostir, og hjólaleigur eru þægileg lausn fyrir stuttar vegalengdir.

Ferðalag út fyrir Malaga

Það væri skiljanlegt að vilja bara vera kyrr og njóta strandarinnar og sólarinnar við Costa del Sol. En ef ævintýraþráin kallar, er stutt í spennandi áfangastaði. Máraborgirnar Granada og Córdoba eru í 2 tíma akstursfæri frá Malaga og bjóða upp á sögulega töfra. Passaðu bara að bóka fyrirfram í hallarvirkið Alhambra, sem er ein af perlum Spánar. Ronda er annar möguleiki, heillandi bær sem situr hátt yfir gljúfri - þú þekkir hann á brúnum.

Austan við Malaga er Axarquía, þar sem hvít þorp, fjallaslóðir og gróðursælir dalir skapa fullkomið andrúmsloft fyrir róleg ferðalög. Þau sem vilja geta skellt sér í göngu eða hjólatúr í Montes de Malaga þjóðgarðinum, aðeins 5 km norður af borginni, sem er gjarnan kallaður „grænu lungu“ Malaga. Þá kemur breski útkjálkinn Gíbraltar skemmtilega á óvart og er í aðeins 2 tíma akstursfæri.