Flug til Berlínar með Icelandair, verð frá 38.105 kr.*

Berlín í hnotskurn

Berlín er allt annað en einsleit borg – andlit hennar eru ótalmörg. Hvar á maður að byrja í þessum kraumandi potti fjölmenningarinnar?

Borgin er bæði landfræðilega og sögulega miðlæg í Evrópu og minnisvarðar um þessa löngu og átakanlegu sögu eru hér á hverju strái.

Síðustu áratugina hefur Berlín sömuleiðis orðið miðlæg í listalífi álfunnar, eins og ótal gallerí, tónleikar og listviðburðir sem fara þar fram allt árið um kring bera vitni.

Áin Spree þræðir sig í gegnum Berlín þvera og endilanga, en áin var ein helsta forsendan fyrir því að þéttbýli myndaðist á svæðinu til að byrja með.

Ferðalag meðfram ánni, hvort sem er á báti eða á hjóli meðfram bökkum hennar, setur mann í eins konar samband við ferðalanga fyrri alda, þegar skipaferðir voru aðal samgöngumátinn og byggðin við árbakkana var það sem blasti fyrst við þeim sem áttu leið um svæðið.

Hvenær er best að fljúga til Berlínar?

Í Berlín er gróska í menningarlífinu allt árið um kring, í þeim skilningi er enginn slæmur tími til að ferðast þangað.

En þau sem sækjast eftir mikilli útiveru ættu auðvitað að mæta á svæðið yfir sumartímann, þegar líflegt og blómlegt er í almenningsgörðunum, götumarkaðarnir opna og heimamenn kneyfa öl í hreinræktuðum þýskum Biergarten.

Ferðlag til Berlínar að vetri til hefur allt annað yfirbragð. Þá er markið sett á kósí kaffihús, vetrarmarkaði og jólaglögg undir berum himni.

Með Icelandair VITA er hægt að bóka pakkaferð til Berlínar.

Kannaðu sögulega staði í Berlín

Margir af afdrifaríkustu atburðum 20. aldarinnar áttu sér stað í Berlín. Nokkrar byggingar virka sem minnisvarðar um þessa sögulegu fortíð.

Hér mætti nefna þinghúsið, Reichstag, Brandenborgarhliðið, minnisvarðann um helförina og rústir Berlínarmúrsins.

Fjöldi safna varpar ljósi á sögu borgarinnar sem og ótal margt annað. Á Safnaeyjunni svokölluðu má berja augum ótrúlegt safn sögulegra minja og listgripa.

Á eyjunni er líka frægur markaður um helgar, Berliner Kunstmarkt, sem vel er þess virði að heimsækja.

Verslanir í Berlín

Kurfürstendamm er helsta verslunargata borgarinnar (heimamenn kalla hana Kudamm). Hún er yfir 3 km að lengd og full af búðum og verslunum.

Þau sem eru í leit að því allra fínasta ættu að smeygja sér inn á Fasanenstrasse, en matgæðingar ættu ekki að láta matarsalina inn í KaDeWe-stórverslunni (Kaufhaus des Westens) fram hjá sér fara.

Markaðirnir í Berlín eru vinsælir bæði meðal heima- og ferðamanna. Af nógu er að taka, en sunnudagsmarkaðurinn í Mauerpark er fullkominn ef þú ert í leit að því nýjasta í heimi tísku og listar.

Máltíð að hætti Berlínarbúa

Þú kemst á bragðið af vinsælustu réttum borgarinnar á næsta imbiss eða skyndibitastað.

Currywurst (karrýpylsa) er klassískur réttur og þú getur fengið döner kebab á nánast hverju götuhorni.

Það er því nóg af skyndibita á svæðinu en það sama má segja um fínni og dýrari veitingastaði – og í raun allt þar á milli: hér eru fínir kaffibarir, heimilslegar krár og íburðarmiklar sælkerabúðir.

Annar klassískur sem rétt er að nefna er Köningsberg Klopse, stálheiðarlegar kjötbollur í hvítri sósu með kartöflum.

Hvar eru bestu bitarnir?

Taktu stefnuna á hverfi eins og Scheunenviertel, Kreuzberg, Neukölln og Prenzlauer Berg.

Kreuzberg-hverfið er rómað fyrir litríkt lista- og menningarlíf. Hér er kjörið að heimsækja flóamarkaðina og blanda geði við innfædda, bragða á currywurst eða kebab, panta sér kaffi af öllum gerðum sem hægt er að ímynda sér, og líta við á söfnum um sögu og menningu borgarinnar.

Í Prenslauer Berg er svo að finna elstu krá borgarinnar, Prater Garten, sem hefur verið starfrækt frá árinu 1837.

Og svo er um að gera að líta við á „strandbörunum“ svokölluðu, sem iða af lífi meðfram ánni Spree.

Ferðast um miðborg Berlínar

Það er tiltölulega auðvelt að komast leiðar sinnar í Berlín þökk sé lestarkerfunum tveimur, neðanjarðarlestunum (U-Bahn) og ofanjarðarlestunum (S-Bahn), sem báðar tilheyra almenningssamgöngukerfi borgarinnar.

Borgin er heldur stór til þess að raunhæft sé að fara allar ferðir fótgangandi, þó að gönguferð milli helstu staða í miðbænum sé góður kostur.

Þó það kunni að virka þægilegt að leigja bíl, er afar erfitt að finna bílastæði víða í borginni. Auðvelt er að ná í leigubíla.

Ferðast frá flugvellinum og inn í miðbæ

Flug Icelandair til Berlínar lendir á Berlin Brandenburg flugvellinum (BER). Nokkrar leiðir eru færar til að ferðast þaðan niður í bæ.

Hægt er að taka S-Bahn lestina S9 niður á Hauptbahnhof í miðbænum. Ferðalagið tekur um 50 mínútur. Þar sem flugvöllurinn telst vera á C-svæði, ættu farþegar að kaupa ABC miða.

Airport Express vagninn X7 (stoppar við komusvæði flugstöðvar nr. 1) fer á 5 mínútna fresti. Þú ferð út á U-Rudow stöðinni og þaðan getur þú tekið lest inn í hjarta borgarinnar.