Flug til Mílanó með Icelandair, verð frá 40.855 kr.*

Besti tíminn til að heimsækja Mílanó

Besti tíminn til að ferðast til Mílanó er á haustin og vorin. Þá er veður bjart og hlýtt, en hitinn ekki kæfandi og ferðamannastraumurinn ekki yfirþyrmandi.

Þó vinsælt sé að ferðast til Ítalíu að sumri, er gott að hafa í huga að hitastigið getur farið upp fyrir 30 gráðurnar. Rakastig borganna eykur enn á hitann. Ágúst er sennilega sá mánuður þegar mest er um ferðamenn í borginni, þá eru Ítalír sjálfir í fríi.

Vegna fjölda ferðamanna í Mílanó á háannatíma, mælum við með því að bóka flugið með góðum fyrirvara.

Stemningin er miklum mun rólegri yfir veturinn, frá desember og út mars. Þá bjóðast almennt betri kjör á flugmiðum. Á móti er hitastigið talsvert lægra og miðborgin er afar hæglát á þessum tíma.

Samgöngur í Mílanó

Þægilegast er að komast leiðar sinnar í Mílanó með almenningssamgöngukerfi borgarinnar: ATM (Azienda Transporti Milanesi). Kerfið inniheldur strætisvagna, neðanjarðarlestar og sporvagna og miðar eru ódýrir.

Ef þú gistir nærri miðborginni (í grennd við Duomo), er vel hægt að komast á helstu staði fótgangandi. Margir markverðustu staðir borgarinnar eru í grennd hver við annan og það er líka nóg af verslunum í miðborginni.

Annar kostur er að ferðast með leigubíl, eða þjónustu á borð við Uber eða Lyft. Þetta er heldur dýr samgönguleið. Einnig er hægt að taka á leigu bíl, en þá ber að hafa í huga að dýrt er að leggja í stæði og mikil og erfið umferð í borginni.

Sögulegir staðir í Mílanó

Ómetanleg listaverk, ástríða fyrir tísku, gómsætur matur og hágæða knattspyrna – Mílanó býður upp á þetta allt og margt fleira. Bellissima!

Síðasta kvöldmáltíðin eftir Leonardo da Vinci var máluð á seinni hluta 15. aldar og þú getur séð hana í návígi í Santa Maria delle Grazie kirkjunni.

Duomo, hin glæsilega dómkirkja Mílano er annað stórvirki. Hún er gríðarstór, byggð úr marmara, taktu eftir þeim undraverðu steindu glergluggum sem prýða kirkjuna.

Fleiri listaverk prýða þak dómkirkjunnar, stórkostlegar styttur og turnspírur í bland við ótrúlegt útsýni. Það er um að gera að bóka skoðunarferð um kirkjuna með fyrirvara.

List og leikhús í Mílanó

Nóg er af gersemunum í galleríinu Pinacoteca di Brera og samtímalistin laðar margan menningarmógúlinn að borginni.

Einnig er hægt að mæla með listasafninu Museo del Novecento, rétt hjá Piazza del Duomo, sem státar af því besta úr listalífi Mílanó á 20. öld.

Teatro alla Scala er ein besta hljómleikahöll heimsins og innviðir hennar og innréttingar gullslegnar. Gestir eru fyrir bragðið vinsamlegast beðnir um að skella sér í betri fötin enda annað ekki við hæfi!

Mörg sögufrægustu leikhús Ítalíu eru í Mílanó, en þar má nefna Teatro degli Archimboldi, Nazionale, della Cooperative, Manzoni og Studio del Piccolo.

Tískan í Mílanó

Áhugafólk um tísku ætti að skilja nóg pláss eftir í ferðatöskunni. Mílanó hefur um langt skeið verið ein af höfuðborgum hátískunnar og stór ítölsk vörumerki eins og Prada, Armani, Versace og Valentino hafa höfuðstöðvar sínar í borginni.

Ekki láta fína verslunarhverfið Quadrilatero d’Oro (Gullni þríhyrningurinn), rétt norður af Duomo, fram hjá þér fara. Gatan Via Monte Napoleone hýsir flestar hátískuverslanir.

Tískuvikan í Mílanó, sem í raun er haldin tvisvar á ári, varðveitir orðspor borgarinnar sem þungamiðju tískuheimsins.

Jafnvel þó þú sért ekki að sækja Mílanó heim til verslunarferða, þá skaltu stoppa við í Galleria Vittorio Emanuele II. Salir þessarar sögulegu verslunarmiðstöðvar eru frá 1860 og státa af glæsilegum arkítektúr.

Ef þú vilt fá smá pásu frá verðmiðum merkjavara er gott að halda til stóru matvöruverslananna og smakka á einhverju góðgæti eða halda til hverfanna Brera og Navigli.

Besta ítalska matargerðin

Við vitum öll að matur er snar þáttur í ítalskri menningu. Mílanó bregst ekki bogalistin í þeim efnum, enda einkennisréttir borgarinnar ekki af verri endanum: Risotto alla milanese (auðvitað með miklu smjöri og ilmandi saffran) og svo auðvitað Cotaletta alla milanese (þunnar kálfakjötssneiðar í brauðhjúp, steiktar upp úr smjöri).

Þú getur þefað upp allar trattoríurnar í hliðargötunum, öll skemmtilegu kaffihúsin og vínbarina sem og fjölmarga Michelin-stjörnu veitingastaði. Þú finnur góða veitingastaði meðal annars í hverfunum Porto Garibaldi, Brera og Navigli. Unga fólkið heldur aðallega til Porto Romana.

Til að koma matarlystinni af stað er nauðsynlegt að heimsækja Peck, verslun sem heimamenn hafa í hávegum, en hún hefur verið starfrækt frá árinu 1883.

Og auðvitað má ekki gleyma að halda í hefðir heimamanna og fá sér aperitivo, lystaukandi drykk með bragðgóðum léttum veitingum.