Flug til Krítar með Icelandair

Í gegnum aldirnar hafa margar þjóðir kallað Krít heimili sitt og sú þekktasta er vafalaust mínóíska siðmenningin, frá 3500 fyrir Krist. Margar minjar standa enn uppi frá þessum tíma, frægust er Knossos-höllin sem er staðsett nálægt Heraklíon, stærstu borg Krítar.

Á tímum mínóísku siðmenningarinnar blómstraði Chania, þá kölluð Kydonia, þökk sé náttúrulegu höfninni við borgina. Árþúsundum síðar laðaði höfnin einnig að feneyska kaupmenn, sem settu þann evrópska svip á Chania sem hún er enn þekkt fyrir.

Chania dagsins í dag býður upp á töfraheim fyrir ferðalanga sem vilja ráfa um þröng strætin, fá sér grískt kaffi við sjávarsíðuna og kanna kristaltæran sjóinn sem og heillandi strendurnar. Það jafnast ekkert á við að draga djúpt að sér krítverska andann.

Þjóðvegirnir á eyjunni fögru kalla á góðan rúnt um sveitir Krítar. Við suðurstrandlengjuna eru skemmtileg lítil þorp og óteljandi víkur og vogar þar sem hægt er að stinga sér til sunds. Gullna ströndin á Chrissi-eyju er talin vera ein besta strönd Evrópu og ef þú vilt sækja hana heim fara bátar frá borginni Ierapetra, sem þekkt er fyrir ávaxta- og grænmetisræktun.

Svæðið í kringum Chania býður líka upp á marga spennandi kosti. Stundaðu köfun og kannaðu Chania undir sjávarmáli. Bátar fara frá höfn Chania ef sigling er það sem heillar. Það er einnig gaman að ganga að feneyska vitanum sem byggður var á 16. öld. Balos-ströndin vinsæla er í 90 mínútna akstursfjarlægð vestur af Chania og fyrir göngufólk er 16 km Samaria-gljúfrið á Suður-Krít alveg einstakt.

Fjölda þemagarða er að finna nálægt Heraklíon sem er í 2 tíma fjarlægð frá Chania með bíl eða rútu. Limnoupolis-vatnsgarðurinn er staðsettur nálægt Chania og er vinsæll meðal barna á öllum aldri.