Hafnarborgin Alicante liggur að Miðjarðarhafi og tilheyrir strandlengjunni Costa Blanca, „hvítu ströndinni“. Borgin býður allt sem þarf fyrir rólegt frí: hlýtt og milt veður, stærðarinnar strandsvæði, afþreyingu fyrir alla aldurshópa, náttúrufegurð Miðjarðarhafsins, sýnilega sögu og fjölbreytilega menningu. Héðan er stutt í Benidorm og marga aðra huggulega sumarleyfisstaði og stórborgin Valencia er í 90 mínútna akstursfjarlægð.
Alicante býður upp á alla þá afþreyingu sem þarf í frí fyrir fjölskylduna: blak og busl á strandsvæðinu, fjölda golfvalla með útsýni yfir Miðjarðarhafið og tækifæri til hvers kyns íþróttaiðkunar. Svo ekki sé talað um skemmtigarða á borð við vatnsrennibrautagarðinn Aqualandia og ævintýragarðinn Terra Mítica.
Í hinni aldagömlu borg Alicante er líka margt sem gleður augað. Það er kjörið að kíkja inn í gamla bæinn að kvöldi til, þá sérstaklega á aðaltorgið Plaza de San Cristobal, þar sem getur að líta byggingarlist barokktímabilsins í allri sinni dýrð. Annað einkennismerki borgarinnar, virkið Castillo de Santa Bárbara, gnæfir tignarlega yfir byggðinni á toppi fjallsins Benancantil. Rætur virkisins ná allt aftur til 9. aldar og þaðan gefst gott útsýni yfir Alicante og út á fagurblátt Miðjarðarhafið.
Uppistaðan í hefðbundinni matarmenningu íbúa Alicante er, eins og gefur að skilja í hafnarborg, sjávarfang. Hrísgrjón eru ekki síður í hávegum höfð og hér eru þau ekki notuð sem uppfylling í máltíðina heldur er rík áhersla lögð á nákvæmlega hvernig þau eru matreidd. Arroz a banda er ekki sama og arroz con costra!
Út frá aðalgöngugötu bæjarins, Explanada de España, má finna fjöldamörg veitingahús, en gamli bærinn í heild sinni býður upp á fjölbreytilegt úrval kræsinga og gönguferð um sagnaríkasta svæði borgarinnar fylgir í kaupbæti.
Vinsælasta sælgætið á svæðinu er hið svonefnda Turrón de Jijona, núggat blandað möndlum og hunangi, en þetta gotterí tengja íbúar Alicante við jólahátíðina.
Alicante er sérstaklega lífleg á sumrin, þegar ýmis konar listviðburðir og fjörugir götulistamenn auðga mannlífið. Þar ber sérstaklega að nefna Noche de San Juan, eða Jónsmessu, þann 24. júní ár hvert, þegar tendrað er í brennum, að sögn til að reka burt illa anda.
Þeim sem heimsækja borgina gefst líka kostur á að kynna sér menningar- og listasögu svæðisins í söfnum á borð við MARQ Museo Arqueologico de Alicante og Museu de Belles Arts Gravina.
Svo er hægt að skella sér í dagsferð út til eyjarinnar Tabarca, sem býður upp á þægilegt strandlíf og fagurt náttúrulíf, en árið 1986 varð eyjan yfirlýst verndarsvæði fyrir sjávardýr. Þess vegna er Tabarca líka kjörinn staður til að snorkla og kanna litbrigði undirdjúpanna.
