Þetta er staðreynd sem fær þig kannski til að klóra þér í höfðinu: Stærsta frönskumælandi borg í heimi er í... Kanada? Þú gætir einnig spurt þig, hvernig virkar það? Svarið við því er: Það virkar eins og töfrum líkast.
Icelandair býður ódýrt flug til Montreal fjórum sinnum í viku, svo þú hefur nægan tíma til hrærast í þeim hvirfilbyl sem kúltúr Montreal er. Það er eitthvað um að vera allan ársins hring sem gerir þessa borg alveg ómótstæðilega.
Montreal fékk í arf alla indælustu eiginleika Kanada (sem er mikilvægt, þar sem Kanada er þekkt fyrir hve indælt það er) og toppar það með frönskum heimsborgarbrag. Það skiptir ekki máli hvaða árstími er, borgin heillar í litadýrð haustlaufanna sem og þegar snjórinn hefur breytt henni í snæviþakið ævintýri. Á sumrin lifna strætin við með matarmörkuðum og kaffihúsum, að ónefndum öllum hátíðunum sem fagna jazzi, uppistandi, kvikmyndum og að sjálfsögðu gay pride.
Gamli hluti Montreal er fæðingarstaður borgarinnar og því er rökrétt að hefja skoðunarferðirnar þar: hellulögð stræti og stór torg flytja þig til annarra tíma. Gotneska basilíkan Notre-Dame er íburðarmikil bygging og ekkert minna áhugaverð en nafna hennar í París. Finndu götuna Rue St-Denis í Latínuhverfinu en barir og kaffihús þar eru vinsæl meðal námsmanna. Göngutúr um grænu svæði Parc du Mont-Royal bætir og kætir en svæðið er vinsælt meðal heimamanna.
Þú veist að þessi borg á eftir að bjóða upp á matarævintýri, er það ekki? Þegar franska eldhúsið mætir nýjungum nýja heimsins er útkoman sannarlega ljúffeng. Fjölmörg bístró og brasserie-staðir reiða fram franskt góðgæti en það vantar þó alls ekki upp á frumlegu réttina eða alþjóðlegu matargerðina. Markaðirnir í Montreal eru fyrsta flokks: farðu á Marché Jean-Talon í litlu Ítalíu og leyfðu bragðlaukunum að njóta á heimsmælikvarða.
Vissir þú að Montreal hefur getið af sér gott orð í beyglubakstri (og veitir New York jafnvel smá samkeppni)? Við teljum okkur þó vita hvar forvitni þín liggur helst. Þig langar að vita meira um poutine, n'est-ce pas? Rétturinn samanstendur af frönskum með ferskosti (cheese curds) sem er síðan drekkt í brúnni sósu. Þetta er í senn skyndibiti og heimagert ljúfmeti og við viðurkennum að rétturinn lítur ekkert mjög vel út. Það er samt nauðsynlegt að smakka á honum meðan Montreal er sótt heim.
Flottur stíll og góð hönnun er auðkenni Montreal (hún er eftir allt saman hönnunarborg Unesco) og markaðir geyma oft frábæran mat, tísku og fleira. Marché Bonsecours er sögulegt kennileiti sem teygir úr sér í gamla bænum. Þar eru margar handverksverslanir sem selja aðeins vörur framleiddar í Quebec. Avenue du Mont-Royal er stórkostlegur staður til að eyða deginum og gaman er að skoða flottar verslanir, fjölbreytt mannlífið og fjölda bara og kaffihúsa.
Veturnir geta verið harðir í Montreal sem gæti útskýrt af hverju sumar versluargötur eru neðanjarðar. Réso er þekkt undir nokkrum heitum (þar á meðal sem hin skuggalega La Ville Souterraine, eða neðanjarðarborgin). Þetta er neðanjarðarkerfi á nokkrum hæðum sem samanstendur af göngum og stigum og tengir saman verslunarmiðstöðvar, neðanjarðarlestir, skrifstofuhúsnæði, hótel og margt fleira. Allt í allt er þetta um 32 km og við mælum því með að þægilegir gönguskór fái að fylgja með þegar pakkað er niður!
